BCAMeko Optimizazio Konbinatorioko ikerketa-taldeko burua den Carlos Coello NBEk sortutako Adimen Artifizialari buruzko Nazioarteko Panel Zientifiko Independentean izendatu dute kide.

• Coello Ikerbasque-ko ikertzaile irakaslea da BCAMen (talde-burua, Optimizazio Konbinatorioa).
• Panelak 40 kide izango ditu, hiru urteko agintaldiarekin, oreka geografikoa eta diziplina-aniztasuna kontuan hartuta hautatuak. Mundu mailako lehen organismo zientifikoa da, “erabat independentea eta bereziki adimen artifizialari eskainia”.
• Bere misioa izango da “herrialdeen arteko ezagutza-arrakala murriztea eta teknologia honen aukerei, arriskuei eta eragin ekonomiko eta sozialei buruzko ebidentzietan oinarritutako ebaluazioak eskaintzea”.

Carlos Coello, Ikerbasque-ko ikertzaile irakaslea BCAMen eta BCAMeko Optimizazio Konbinatorioko ikerketa-taldeko burua, NBEk sustatutako Independent International Scientific Panel on Artificial Intelligence delakoan izendatu dute kide.

NBEko idazkari nagusiak, António Guterresek, aste honetan iragarri du organismo honen sorrera; Batzar Nagusiaren aginduz sortu da teknologia honen eraginak ebaluatzeko. Panelak 40 kide izango ditu, hiru urteko agintaldiarekin, oreka geografikoa eta diziplina-aniztasuna kontuan hartuta hautatuak. Guterresen arabera, “erabat independentea eta bereziki adimen artifizialari eskainia” den lehen organismo zientifiko globala da. Gaineratu du bere misioa izango dela “herrialdeen arteko ezagutza-arrakala murriztea eta teknologia honen aukerei, arriskuei eta eragin ekonomiko eta sozialei buruzko ebidentzietan oinarritutako ebaluazioak eskaintzea”.

Panelak urteko txosten bat egingo du izaera “ez-preskriptiboarekin”, hau da, aholkularitza-izaerakoa eta ez normatiboa, estatu kideentzat eta nazioarteko beste eragile batzuentzat erreferentzia izateko helburuarekin. Bere kideek izaera pertsonalean jardungo dute, gobernu, enpresa edo erakundeetatik independente.

Izendapen honek Coelloren ibilbide zientifikoaren aitortza dakar, baita optimizazioaren eta adimen konputazionalaren arloan egindako lanaren nazioarteko garrantzia ere, eta adimen artifizialaren garapen arduratsurako funtsezko teknologietan ezagutzaren aurrerapenari egindako ekarpena.

Carlos Coello Ikerbasque-ko ikertzaile irakaslea da BCAMen, eta metaheuristika bioinspiratuen bidezko optimizazioan oinarritutako ikerketak gidatzen ditu; diziplina zientifiko eta teknologiko askotan arazo konplexuak ebazteko funtsezko arloa da.

Bere ibilbidean zehar, nazioarteko prestigiodun sari ugari jaso ditu; besteak beste, Mexikoko Zientzien Akademiak emandako Zientzia Zehatzetako Ikerketa Sari Nazionala (2007), Mexiko Hiriko Kongresuak emandako Merezi Zientifikoaren Domina (2009), Heberto Castillo – Ciudad Capital Saria (2011), Scopus Award (2012), Mexikoko Fisika, Matematika eta Natura Zientzietako Zientzia Domina Nazionala (2012), IEEE Kiyo Tomiyasu Award (2013), The World Academy of Sciences erakundearen TWAS Award (2016), Luis Elizondo Saria (2019) eta IEEE Computational Intelligence Society Evolutionary Computation Pioneer Award (2021). Halaber, IEEE Fellow da, ingeniaritza eta teknologiaren arloan ekarpen bikainak egin dituzten ikertzaile gutxi batzuei ematen zaien bereizketa.

BCAMera iritsi aurretik, nazioarteko erreferentziazko erakundeetan garatu zuen bere ikerketa-lana, hala nola Plymouth Engineering Design Centre-n (Erresuma Batua) eta Informatika Aurreratuko Laborategi Nazionalean (Mexiko).