Bizkaiko 150 ikasle baino gehiagok BCAM bisitatu dute martxoan

• Bisita hauek “Matematikhariak” programaren barruan kokatzen dira, ikasleen artean STEM bokazioak piztea helburu duen BCAMen dibulgazio-jarduera.
• Madre de Dios ikastetxeak itsas energia berriztagarriei buruzko hitzaldi batean parte hartu zuen, MSCA ORE4CITIZENS proiektuaren baitan.

BCAMek ikasleei zuzendutako dibulgazio zientifikoarekin duen konpromisoa berretsi egiten du, belaunaldi berriak matematikara eta zientziara hurbiltzea helburu izanik. Horrela, martxoan zehar, Matematikhariak programaren baitan, zentroak 150 ikasle baino gehiago hartu zituen, ikerketa-taldearen lana eta zentroko egunerokoa bertatik bertara ezagutzeko aukera izan zutelarik.

Javier Sanguino (doktoratua egiten ari den ikertzailea, Machine Learning) eta Andrea Olivo (ikertzaile postdoktorala, Harmonic Analysis) Artaza Romo BHI ikastetxearekin aritu ziren. Ikasleek matematikaren aplikazioak modu interaktiboan esploratu ahal izan zituzten hezkuntzaren arloan, matematikaren arlo puruari buruz gehiago ikasiz eta adimen artifizialaren erronkak eta aplikazioak ezagutuz, Kahoot baten eta Andrearen eta Javierren laneko adibideen bidez.

Bestalde, Ainhize Barrainkua (doktoragaia, Machine Learning) eta Pablo Merino (doktoragaia, Linear and Non-Linear Waves) Salesianos Barakaldo ikastetxearekin aritu ziren. Saioan zehar, ikasleek berdintasun algoritmikoa eta ikaskuntza automatikoa, IA algoritmoetan dauden alborapenak eta horien eragin erreala, baita fisika matematikoan funtsezkoak diren ekuazio diferentzial partzialen oinarrizko kontzeptuak ere landu zituzten.

Horrez gain, martxoaren 25ean, Madre de Dios ikastetxeak BCAM bisitatu zuen ORE4CITIZENS proiektua ezagutzeko. Batxilergoko 45 ikaslek BCAMen instalazioak bisitatu zituzten eta “The Powers of Shazam: AI, Music, and Floating Wind” izeneko hitzaldian parte hartu zuten, Vincenzo Nava BCAMeko ikertzaileak eskainita. Saioan zehar, ikasleek Shazam aplikazioak segundo gutxitan abestiak nola identifikatzen dituen ikasi zuten, prozesu hori seinaleen analisia eta mugikorreko grabazioetatik lortutako aztarna digitalen kontzeptuekin lotuz. Hitzaldiak musikaren esparrutik harago jo zuen, eta azaldu zuen nola aplika daitezkeen ezagutza horiek energia eoliko flotatzailean, adimen artifiziala erabiliz egitura-arazoak detektatu eta konpontzeko. Jarduera hau MSCA ORE4CITIZENS proiektu europarraren parte da, itsas energia berriztagarrien inguruko ikerketa herritarrengana hurbiltzea helburu duena.

Ekimen hauek BCAMek zientzia eta matematika ikasgeletara eramateko duen etengabeko konpromisoa islatzen dute, etorkizuneko ikertzaileak inspiratuz eta heziz ikerketa zientifikoaren mundu zirraragarrian.