Imanol Gago Carrok bere doktorego-tesia defendatuko du abenduaren 17an, asteazkenean

• Defentsa Adela Moyua Aretoan izango da, Zientzia eta Teknologia Fakultatean (EHU-Leioa), 10:45ean.

Imanol Gago Carrok (Bilbo, 1992) betidanik izan du matematikarekiko interes eta jakin-min handia, eta, horregatik, ez zen harritzekoa arlo horretan ikasketak egitea erabaki izana. Euskal Herriko Unibertsitatean Matematikako gradua eskuratu zuen 2014an, Madrilen ikasturte bat eginda. Ondoren, Ingeniaritza Matematikoko masterra egin zuen 2016an Madrilgo Unibertsitate Konplutentsean. Enpresa pribatuetan eta erakunde publikoetan esperientzia lortu ondoren, 2019an Basque Center for Applied Mathematics (BCAM) zentroko Optimizazio Konbinatorioko (CO) ikerketa-lerroan sartu zen. 2021ean Euskal Herriko Unibertsitateko Matematikako eta Estatistikako doktorego-programan hasi zen. Gaur egun, Eustaten, Euskal Estatistika Erakundean, teknikari estatistiko gisa lan egiten du. Bere interes pertsonalen artean daude mendian korrika eginez galtzea, lagunekin mahai-jokoetan aritzea eta zinema berrien estreinaldiak ikustera joatea.

Bere tesia, «Ziurgabetasunpeko optimizazioa anbulantzien kokapenerako eta esleipenerako» izenekoa, Unai Aldasoro Marcellan (EHU) eta María Merino Maestre (BCAM-EHU) irakasleek zuzendu dute. Tesiaren defentsa 2025eko abenduaren 17an egingo da, Adela Moyua Aretoan, Zientzia eta Teknologia Fakultatean (EHU-Leioa), 10:45ean.

BCAM osatzen dugun pertsona guztien izenean, etorkizun profesional eta pertsonalean zorterik onena opa diogu.

Laburpena

Tesi honek Larrialdi Zerbitzu Medikoen (LZM) plangintza estrategikoa aztertzen du, anbulantzien kokapena eta esleipena ziurgabetasun-egoeretan eta helburu anitzekin modelizatuz. Euskal Autonomia Erkidegoko larrialdi-zerbitzu publikoak benetako kasu gisa erabiliz, datu-base historikoak baliatzen dira proposatutako ereduetan pixkanaka sartzen den ziurgabetasuna modelizatzeko. Horrela, bidaia-denbora estokastikoak estimatzen dira egokitutako banaketen bidez (bereziki, BCCG), clustering prozesuak eta GAM ereduak erabiliz.

Lehen eredu gisa, bi etapatan egindako 0-1 MILP estokastiko bat proposatzen da, birkokatze- eta hedapen-politikak ebaluatzeko, eraginkortasun orokorra eta eskualdeen arteko ekitatea orekatuz. Ereduak larrialdien ziurgabetasun espazio-denborala eta erantzun-denboraren penalizazioa jasotzen ditu tarte desberdinetan.

Bigarrenik, konpromiso-eredu hierarkiko bat formulatzen da: lehenik estaldura maximizatzen da, eta ondoren batera hobetzen dira batez besteko erantzun-denbora, baliabideen egokitasuna eta ekitatea (CVaR erabiliz). Eskala handiko kasuei aurre egiteko, Branch-and-Fix Coordination matheuristikoa hedatzen da eszenatokien arteko murrizketak kudeatzeko. Eredu honek osagai ziurgabe berri bat txertatzen du: anbulantzien bidaia-denborak.

Hirugarrenik, banaketa bidezko optimizazio sendoaren (DRO) esparru bat garatzen da bidaia-denboren banaketak gaizki zehaztuta egotearen aurrean babesteko, eta optimizazio estokastiko eta sendoarekin alderatzen da. Gertaera diskretuen simulazio-eredu batek erakusten du DROren soluzioak hobeto lerrokatzen direla sistemaren diseinuarekin eta funtzionamenduarekin.

Oro har, tesiak teoria eta praktika uztartzen ditu, datu errealistak, algoritmo eskalagarriak eta balioztatze zorrotza erabiliz.